Pak Camaik tantu bapikia, si Tamburin ko sadang mambuek konsep surek nan inyo parintahkan tadi pagi, apolai Pak Camaik bapasan ka si Tamburin “Kok ragu Waang Tam jo rancana bara biaya proyek buek SD di Kecamatan nagari awak ko, arsipnyo ado dek Tan Baro” baitu kecek Camaik ka si Tamburin katiko inyo kanai panggia tadi pagi.
“Tan Baro..apo nan waang karajokan tu, maetong angko-angko proyek SD tu Waang” si Tamburin mambuka kecek
“Iko ha Tamburin Waang caliak se lah paretongan angko-angko mode kini ko”
Si Tamburin lah manyigi etongan angko-angko dikareteh kosong di meja Tan Baro ko
“Onde…mancari nomor buntuik Waang yo, iko kan indak ado lai dijua tarang-tarang dikadai kopi, lah di basmi dek aparat, keceknyo ka urek-ureknyo” si Tamburin agak
takajuik dek si Tan Baro masih indak lupo juo jo candu lamonyo ko
“Waang ndak tahu do Tamburin, iyo tarang-tarangan co dulu mamasang buntuik dikadai kopi indak bisalai, kok ndak tarang yo cari nan galok” baleh si Tan Baro
“Makasuik nan galok mamasang buntuik ko baa ?, si Tamburin penasaran
“Ado beko kaki tangan agen buntuik tu datang ka Waden, tingga maagiahkan nomor pasangan se lai jo kepeang, tu inyo catat, nan waden ndak tahu kama kaki tangan agen buntuik ko manyetor, kok kalua nomor Waden inyo datang maagiah tahu jo hadiah sasuai bara angko nan den pasang” Si Tan Baro maagih panjalasan ka si Tamburin
“Beko lah waang maituang angko nan mambuek kapalo den paniangko, kalua awak lai dari kantua ko, tu lawan domino awak lah manunggu di lapau si Lena , sakik ati den
dek kalah nan kapatang, waang den caliak agak lamah main waang katiko awak kalah jo si Kutar nan mandannyo Si Raman”
“Nan kalah ka patang Waden ilang pangana Tam, dek Waden ado masalah jo urang rumah, tapi Waang paso juo Waden main katiko tu, tapi kok kini Tam lah tarang utak Den liak badomino, awak lawan baliak si Kutar jo si Raman, awak agiah inyo ka “bulan”, indak diagiah ancik lai”
“Segeh lah waang lai, angkek ikua dari kursi tu, jaan baduo awak sakali kalua” Si Tamburin maangkek karate etongan buntuik si Tan Baro tadi sambia mangecek-ngecek tu pandangan suduik matonyo inyo layangkan ka ruang Pak Camaik’
“Iyolah Tam,,den pai lu ka lapau si Lena tu,
“Taruih lah, sabanta lai den irik lo langkah ka sinan”
***
Si Tamburin jo si Tan Baro lah tibo di lapau si Lena, disinan lah manunggu lawan bareknyo badomino si Kutar jo si Raman. Sabalun batu domino bakucatak di meja nan
dialeh triplek tipih, urang barampek pagawai nagari nan masih mamakai baju siragam tampek dinas masiang-masiang makan siang manjalang luhua di lapau si Lena.
“Lah..lah..main wak lai, Lena baok kasiko batu domino nan didalam kaleng tu” Si Bahar ndak saba lai untuak malawan si Kutar nan bamandan jo si Raman.
“Sarupo biaso yo Tam, awak main limo set sajo, sia nan kalah bayialah makan, minum jo rokok nan awak pasan disiko,..Lena..lena..goyang teh talua ampek lah, tu tambah rokok 4 bungkuih lo” Kecek si Kutar sambia mangocok batu domino nan lah tatumpah dari kaleng ka meja.
“Tan Baro simak main ko stek, caliak main Mandan jan asa sorong se batu tu, kapatang lamah bana parituangan Waang den caliak, kini baa lah kosentrasi bana waang ko” Si Tamburin maingekan mandannyo Tan Baro
“Iyo lah Tam, kapatang utak den bacabang dek ado masalah stek jo urang rumah”
Lah bajadi bakuhampai main domino pagawai kantua ko, manjalang ka putih set partamo, tibo-tibo si Tamburin tapakiak dek ulah si Tan Baro mambunuah balak anam
Mandannyo surang.
“Tan Baro,ndak manyimak Waang main, dari turun pagi lah barakali den agiah ikua anam tu, indak waang anam-anamkan malah waang adu” Si Bahar mambuka 3 buah batunyo tamasuak balak anam nan mati, jo duo batu lain nan sairiang sajalan jo balak anamnyo
“Tanang se lah lah den etong tu batu baradu ko, den bunuah balak anam waang kan bia takunci batu ko, balak limo den kalua, nan batu den ketek matonyo, bukak lah lai batu tu, nan batu den 14 mato, bara mato waang Kutar..Raman” Si Tan Baro lah mancaliak mato domino nan tingga ka si Kutar jo Raman, samantaro si Tamburin ndak masuak etongan lai dek batunyo nan tingga gadang-gadang matonyo.
“Lawan batu den dek waang Tan Baro, etong dek waang kalah sagiriak waang mah dari mato batu den…balak ese, balak duo, ampek tigo jo duo kosong jumlahnyo 13.” Si Kutar manunjuak mato batunyo ka si Tan Baro
“Iyolah lamah bana waang Tan Baro, indak putiah dek waang paretongan bara mato lawan nan tingga, cubo waang anam-anam kan, lah jaleh santiang jo waden batu tu,
aturan awak di set partamoko tingga mancari sabaleh se lai, lah gim dek urang mah” Si Tamburin mancampakan batunyo katangah jo muko agak singik ka mandannyo
si Tan Baro nan asa ma maadu batu sajo.
Tan Baro ka manjawek kecek si Tamburin, tibo-tibo dari sampiang lapau si Lena, datang oto kijang kompong nan ado kursi diateh baknyo, dari oto tu turun 5 urang pagawai PP (Pamong Praja) nan sadang batugeh marazia pagawai nagari nan suko cabuik di jam karajo.
Urang nan parampek ko indak dapek mangelak lai tatangkok basah dek anggota PP, lah inyo cataik identitas urang barampek namo jo dima instansi batugeh salaku Pagawai Nagari. Tamburin, Tan Baro, Kutar jo si Raman tapaso maneken berita acara kajadian ko.
Dari subarang lapau si Lena, dibaliak batang asam, nampak Rubiah bini si Tan Baro maintip kajadian ko, hatinyo sanang lakinyo Tan Baro tatangkok dek patugeh PP. Si Rubiah nan maagiah tahu ka patugeh PP di lapau si Lena ado ampek urang Pagawai Nagari cabuik di jam karajo tamasuak lakinyo
Si Rubiah lah duo minggu bacakak jo lakinyo si Tan Baro. Alah abih kasabarannyo mancaliak tingkah laku lakinyo nan pitih gajinyo abih dek main buntuik jo domino nan mambuek dapua di rumah indak “barasok” Si Rubiah baharok bia si Tan Baro lakinyo sadar. Kok sakali kanai tangkok tantu inyo lai indak dipecat jadi pagawai, paling dapek surek paringatan kareh dari atasannyo.
Sanak kasadonyo
iko sekedar...selingan sajo...
main domino ko yo candu urang awak..jam karajopun masih maampeh meja dilapau kopi..lah pemandangan umum awak caliak
danga2 kaba buruang si Tamburin jo Tan Baro..ko prestasinyo cukuik spektakuker di Domino, lah labiah 10 Meja lapau si Lena ..pacah2 dek hampe batunyo..ha...ha..ha
cilotehko fiksi belaka, kok ado namo jo gala nan samo hanyo kebetulan belaka
salamiak berakhir pakan....
Oleh : Ir. Jupardi
Tidak ada komentar:
Posting Komentar